Detaje të reja dalin nga krimi makabër në fshatin Frashër të Fierit, ku 56-vjeçari Anesti Rama u mbyt me tel nga e bija, Ermalinda Rama, ngjarje e ndodhur mbrëmjen e së mërkurës, por që u tentua të fshihej si aksidentale nga 26-vjeçarja dhe nëna e saj, Valbona Rama, tashmë të dyja në prangat e policisë.
Mësohet se vajza ka pasur bashkëpunëtor një 55-vjeçar në vrasjen e babait të saj. Në prangat e policisë ka rënë 55-vjeçari Çlirim Dogani, me të cilin dyshohet se Ermalinda Rama ka pasur një lidhje dashurie.
Policia sqaron se Çlirim Dogani ka ndihmuar 26-vjeçaren që të mbyste me tel të atin. Ndërsa në vrasjen e 56-vjeçarit Anesti Rama, dy autorët e dyshuar të krimit kanë përdorur sende të forta dhe mjete prerëse.
“Në vijim të hetimeve të kryera me qëllim dokumentimin e plotë të rrethanave të ngjarjes, specialistët e Seksionit për Hetimin e Krimeve Kundër Personit të Drejtorisë Vendore të Policisë Fier bënë ndalimin e shtetasit Ç. D., 55 vjeç, banues në fshatin Arapaj, Roskovec.
Nga kryerja e hetimeve dyshohet se ky shtetas ka bashkëpunuar me shtetasen E. R., në vrasjen e babait të saj nëpërmjet strangulimit (mbytje me tel), si edhe duke përdorur sende të forta dhe mjete prerëse”, informuan blutë.
Sipas burimeve, motra e Emalindës, e cila aktualisht jeton në Itali, është e martuar në fshatin Suk të Roskovecit.
Ajo mbante të motrën herë pas herë në shtëpinë e saj, ku punonte në serat e fermerëve të zonës Suk 1 dhe Suk 2, në fshatin Arapaj.
Aty mësohet se Ermalinda është njohur me Çlirimin dhe dyshohet se kanë krijuar lidhje dashurore.
Njoftimi i policisë:
Punë e pandërprerë hetimore për zbardhjen e plotë të rrethanave të ngjarjes së ndodhur në fshatin Frashër, ku shtetasja E. R. vrau për motive të dobëta, babanë e saj.
Vihet në pranga bashkëpuntori i 26-vjeçares.
Në vijim të hetimeve të kryera me qëllim dokumentimin e plotë të rrethanave të ngjarjes, specialistët e Seksionit për Hetimin e Krimeve Kundër Personit të Drejtorisë Vendore të Policisë Fier bënë ndalimin e shtetasit Ç. D., 55 vjeç, banues në fshatin Arapaj, Roskovec.
Nga kryerja e hetimeve dyshohet se ky shtetas ka bashkëpunuar me shtetasen E. R., në vrasjen e babait të saj nëpërmjet strangulimit (mbytje me tel), si edhe duke përdorur sende të forta dhe mjete prerëse.
Materialet procedurale iu referuan Prokurorisë së Fierit, për veprime të mëtejshme.
