Një ngjarje e rëndë është regjistruar në orët e para të mëngjesit të sotëm në lagjen nr. 1 të Pogradecit, ku një grua 52-vjeçare u gjet e pajetë në banesën e saj të përfshirë nga flakët.
Fillimisht u raportua se Kozeta Teço kishte ndërruar jetë nga asfiksia, por hetimet e mëvonshme zbuluan shenja dhune në trupin e saj, duke ngritur dyshimet për një vrasje të qëllimshme.
Sipas të dhënave nga grupi hetimor, dyshohet se autori 37-vjeçar, Ilirjan Selmani, fillimisht e ka vrarë gruan dhe më pas i ka vënë zjarrin banesës me qëllim fshehjen e gjurmëve dhe paraqitjen e ngjarjes si aksidentale.
Pamjet nga kamerat e sigurisë të vendosura pranë pallatit kanë ndihmuar në identifikimin e një të dyshuari, i cili u pa duke hedhur disa peceta dhe peshqirë me gjak në koshin e mbeturinave pranë vendngjarjes.
Selmani është shoqëruar nga policia dhe aktualisht po merret në pyetje. Gjatë shoqërimit, duke buzëqeshur ai ka mohuar përfshirjen në krim duke thënë:
“Çfarë vrasje? Ç’ne unë? Nuk e kam vrarë. S’më intereson. Nuk jam unë vrasësi.”
Megjithatë, burime nga hetimi bëjnë me dije se Selmani dyshohet të ketë pasur një lidhje intime me viktimën.
Kozeta Teço jetonte e vetme dhe në kushte të vështira ekonomike. Sipas dëshmive të fqinjëve, një natë para ngjarjes, në banesë ka qëndruar edhe motra e saj, e cila më pas është larguar drejt Tiranës.
Ngjarja ka tronditur komunitetin lokal dhe hetimet për zbardhjen e plotë të saj vijojnë intensivisht nga strukturat e Policisë së Shtetit në bashkëpunim me Prokurorinë.
