Detaje të reja kanë dalë në dritë lidhur me ngjarjen e rëndë që ndodhi në Larisa të Greqisë, ku TikTokeri i njohur si Diamanti Blu u dhunua brutalisht gjatë një darke me miqtë e tij.
Burime për JOQ Albania bëjnë me dije se një nga autorët e dhunës është shpallur në kërkim ndërkombëtar. Bëhet fjalë për Agron Zeqo, 36-vjeç, i njohur ndryshe në rrjetet sociale si “Aroni”.
Policia shqiptare në bashkëpunim me autoritetet greke japin shpërblim për këdo që jep informacion që çon në kapjen e tij, duke e cilësuar si person me rrezikshmëri të lartë.
Si ndodhi ngjarja në Larisa
Sipas burimeve, Diamanti ndodhej duke konsumuar darkë me shokët e tij kur para lokalit mbërritën tre automjete. Disa persona qëndruan jashtë, ndërsa njëri prej tyre hyri brenda dhe u ul në tavolinë, gjë që u pa qartë edhe nga transmetimi “live” që po bënte TikTokeri.
Pas ndërprerjes së videos, ai dhe shokët e tij u goditën brutalisht. Diamanti, një kushëri i tij nga Berati dhe një mik tjetër përfunduan në spital, ndërsa autorët u larguan menjëherë.
Hetimet e policisë greke theksojnë se gjithçka ishte e planifikuar prej kohësh dhe se autorët kishin marrë 70 mijë euro pagesë për eliminimin e tij. Për fat, ai i mbijetoi sulmit.
Konfliktet e mëparshme me Aronin
Sipas dëshmive, Aroni ka qenë i përfshirë edhe në raste të tjera dhune. Ai ka publikuar më parë pamje të dhunës ndaj personave të ndryshëm në rrjete sociale.
Një qytetar tregon se Aroni i kishte bërë më parë presion Diamantit, madje e kishte kërcënuar se do t’i digjte banesën në Çinar. Pak ditë më vonë, lokali i Diamantit u sulmua, duke i shkaktuar dëme të mëdha. Personat e arrestuar për këtë sulm kanë deklaruar se pas tyre fshihej pikërisht Aroni.
Të njëjtat burime bëjnë me dije se ai është në kërkim në pesë shtete të ndryshme dhe konsiderohet si një individ i rrezikshëm.
Autoritetet u bëjnë thirrje qytetarëve që nëse kanë informacion mbi vendndodhjen e tij, të kontaktojnë menjëherë me organet ligjzbatuese.
