Një ngjarje e rëndë është zbuluar mesditën e sotme në lagjen nr. 4 të qytetit të Korçës, ku është gjetur i pajetë, në gjendje të avancuar dekompozimi, shtetasi P. S., 60 vjeç, i cili jetonte vetëm.
Sipas njoftimit paraprak të Policisë së Shtetit, rreth orës 11:30, trupi i tij u gjet brenda banesës ku jetonte, ndërsa grupi hetimor ndodhet në vendngjarje dhe po punon për të përcaktuar shkakun dhe kohën e vdekjes, si dhe për të dokumentuar plotësisht rrethanat.
Zbulimi nga vëllai i tij
Ka qenë vëllai i viktimës, që jeton në Tiranë, ai që e ka gjetur trupin pa jetë. Në rrëfimin e tij për mediat, ai tha se prej muajsh nuk kishte pasur asnjë komunikim me të:
“Prej dhjetorit, vëllai im nuk ishte parë nga komshinjtë. Unë nuk kisha komunikim me të, sepse jetoj në Tiranë dhe merrem me punë. Tani që mora lejen e zakonshme, vendosa të vij të shoh shtëpinë që e kemi të përbashkët. Kur erdha, e gjeta të pajetë,” – u shpreh ai.
Sipas dëshmisë, viktima nuk përdorte telefon dhe shpesh qëndronte i shkëputur nga kontaktet me familjarët. Ai ishte i ndarë nga bashkëshortja dhe kishte dy fëmijë – vajza jeton jashtë vendit, ndërsa djali në Tiranë, i cili është njoftuar dhe është nisur drejt Korçës.
Gjendja shëndetësore
Familjarët sqarojnë se 60-vjeçari kishte probleme me zemrën dhe përfitonte kemp për shkak të gjendjes së tij shëndetësore. Dyshohet se vdekja ka ndodhur disa muaj më parë, por për shkak të mungesës së kontakteve dhe të jetesës së izoluar, askush nuk u shqetësua për fatin e tij deri sot.
Pyetje që ngre kjo ngjarje
Rasti tronditës ngre shumë pikëpyetje: Si është e mundur që për kaq muaj askush nuk pyeti për të? As fëmijët, as vëllai, as ish-bashkëshortja dhe as fqinjët nuk e kërkuan, derisa trupi i tij u gjet i dekompozuar. A është ky tregues i një shoqërie që po humbet lidhjet familjare e njerëzore, apo thjesht një rast i dhimbshëm i një jete të izoluar?
Për momentin, autoritetet janë në pritje të ekspertizës mjeko-ligjore, e cila do të përcaktojë shkakun e vdekjes. Ndërkohë, ngjarja ka tronditur komunitetin lokal, duke lënë pas një ndjenjë të rëndë mbi fatin e një burri që për muaj të tërë u harrua nga të gjithë.
