Burime të afërta me kreun e PD bëjnë me dije se Sali Berisha pritet të udhëtojë javën e ardhshme drejt Shteteve të Bashkuara të Amerikës, ku do të zhvillojë një takim të rëndësishëm me një senator amerikan. Ky takim pritet të shërbejë si një sinjal i fortë për “rënien” de facto të “non gratës” dhe rehabilitimin diplomatik të liderit të opozitës shqiptare.
Një zhvillim i tillë do të përbëjë një goditje të rëndë për Edi Ramën në skenën politike shqiptare dhe pritet të rrisë ndjeshëm frymën e mbështetjes për Partinë Demokratike në prag të zgjedhjeve.
Në përfundim, përpjekjet e Sali Berishës për të pastruar imazhin e tij ndërkombëtar janë në një fazë kritike dhe lëvizjet e tij në ditët në vijim pritet të kenë ndikim të madh në dinamikën politike të vendit.
Zbulohen të tjera detaje nga kontrata e lobimit të Berishës…
Sali Berisha është gati të paguajë miliona për të hequr “non gratën”, edhe pse nuk ja doli dot ta heqë para zgjedhjeve, kreu i PD synon ta realizojë atë në javët apo muajt në vijim dhe i ka hyrë fort lobimit.
Ai ka lidhur një kontratë me Continental Strategy, ku do t’i paguajë 6 milionë dollarë në dy vite, kontrata kjo më e shtrenjtë e lobimit e firmosur ndonjëherë nga një parti shqiptare.
Por kush janë njerëzit që ka gjetur Berisha për të lobuar te sekretari Rubio, me shpresën se do t’i hiqet damka e korrupsionit?
Kompania “Continental Strategy” u themelua në vitin 2021 nga këshilltari i tij Carlos Trujillo. Zoti Trujillo e themeloi Continental menjëherë pasi Trump la detyrën, pasi kishte shërbyer në administratën e tij të parë si ambasador në Organizatën e Shteteve Amerikane.
Vetëm disa ditë pas rizgjedhjes së Donald Trump si President i SHBA-ve për herë të dytë, Continental njoftoi një promovim për Katie Wiles, vajzën e Susie Wiles, që shërbeu si shefja e fushatës së presidentit Trump. Kjo e fundit ka qenë bashkë me LaCivita pjesë e ekipit të fushatës.
Disa ditë më pas, Continental kontraktoi Alberto Martinez, një ish shef stafi i sekretarit të Shtetit, Marco Rubio, si një partner menaxhues për të ndihmuar në rritjen e mëtejshme të Continental.
Ndërkohë, në mesin e dhjetorit të vitit të kaluar firma punësoi zëvendës drejtorin politik të fushatës së Trump, Alex Garcia si partner.
Pra, duket se Berisha ka gjetur njerëz shumë të afërt me Trump dhe Rubion, me shpresën se ata do të lobojnë në DASH për të zhbërë vendimin e Blinken. Por pyetja që ngrihet është: Ku i gjen Berisha kaq shumë para? Në kontrata futet emri i një personi nga Tropoja, por zor se dikush e kapërdin. Nuredin Seci që del garantor, rezulton prej 30 vitesh si sportist dhe trajner i ekipit të Alpinizmit Valbona. Pra ku burojnë milionat? /Pamfleti
